Салықтарды және әлеуметтік төлемдерді есептеу кезінде дөңгелектеу

Алматы облысы бойынша Мемлекеттік кірістер департаменті Қазақстан Республикасы Қаржы министрлігі Мемлекеттік кірістер комитетінің  14.03.2022 жылғы №МКК-07-1-9/ЗТ-Х-1101 хатының негізінде, әрбір қызметкер бөлінісінде салықтар мен әлеуметтік төлемдерді есептеу кезінде дөңгелектеуге қатысты, төмендегіні хабарлайды.

Салық кодексінің 190-бабы 3-тармағына сәйкес салық есебі Бухгалтерлік есеп деректеріне негізделеді. Бухгалтерлік құжаттаманы жүргізу тәртібі Қазақстан Республикасының бухгалтерлік есеп пен қаржылық есептілік туралы заңнамасында белгіленеді.

Бұл ретте Салық кодексінің 192-бабының 1-тармағына сәйкес, егер Салық кодексінде өзгеше белгіленбесе, салық төлеуші (салық агенті) Салық кодексінде белгіленген тәртіппен және шарттарда есептеу әдісі бойынша теңгеде салық есебін жүргізуді жүзеге асырады.

Бұдан басқа, "жеке табыс салығы (бұдан әрі-ЖТС) және әлеуметтік салық бойынша Декларация (200.00-нысан)" салық есептілігі нысанында да тиындарды көрсетуге арналған жолдар көзделмеген.

Жеке тұлғалар ЖТС және міндетті зейнетақы жарналарын (бұдан әрі-МЗЖ) төлеушілер болып табылатынын, ал жұмыс берушіге салымшылардың дербестендірілген шоттарына ЖТС және МЗЖ есептеу, ұстап қалу және аудару бойынша міндеттемелер жүктелетінін атап өткен жөн.

Бұл ретте Салық кодексінің 486-бабының 3-тармағына сәйкес бюджетке төленуге жататын әлеуметтік салық сомасы есептелген әлеуметтік салық пен "міндетті әлеуметтік сақтандыру туралы" Қазақстан Республикасының Заңына сәйкес есептелген әлеуметтік аударымдар сомасы арасындағы айырма ретінде айқындалады.

Қазақстан Республикасы Үкіметінің 2004 жылғы 21 маусымдағы № 683 қаулысымен бекітілген Мемлекеттік әлеуметтік сақтандыру қорына әлеуметтік аударымдарды есептеу және аудару және олар бойынша өндіріп алу қағидалары мен мерзімдеріне сәйкес әлеуметтік аударымдарды есептеу кезінде тиынмен есептелген сомалар 1 теңгеге дейін дөңгелектенеді.

Осылайша, еңбекақы төлеу қорынан салықтар мен әлеуметтік төлемдер әрбір қызметкер бойынша жеке есептелетінін ескере отырып, тиісінше жұмыс беруші салық агенті әрбір қызметкер бөлінісінде салықтар мен әлеуметтік төлемдерді есептеу кезінде математикалық дөңгелектеуді жүргізеді.