26 желтоқсанда ҚР Мемлекеттік қызмет істері және сыбайлас жемқорлыққа қарсы іс – қимыл агенттігінің Төрағасы Алик Шпекбаев "Жетісу-адалдық алаңы" жобалық кеңсесінің ашылуына қатысты.

"Жетісу–адалдық алаңы" жобасы сыбайлас жемқорлық деңгейін қысқартуға, сыбайлас жемқорлықты жалпыға бірдей қабылдамауды қалыптастыруға, Алматы облысындағы мемлекеттік билік институттарына азаматтардың сенімін арттыруға бағытталған.

Жұмыс сапары аясында ол сондай-ақ Талдықорған қаласы бойынша Мемлекеттік кірістер басқармасына барды.

Мемлекеттік кірістер органдары барынша автоматтандырылған мемлекеттік органдардың бірі болып табылады және электрондық форматта көрсетілген мемлекеттік қызметтердің үлесі жыл сайын өсіп келеді.

Бүгінгі күні мемлекеттік кірістер органдары 45 Мемлекеттік қызмет түрін көрсетеді, оның 31-і автоматтандырылды. Мысалы, 2016 жылы электрондық түрде көрсетілген қызметтердің үлесі 79% – ды, 2017 жылы-85,5% - ды құраса, 2018 жылдың ағымдағы кезеңінде 91,6% - ды құрайды, яғни 1 306 427 қызмет көрсетілді.

Алматы облысы бойынша Мемлекеттік кірістер департаментінің басшысы Е. Нұрланбаевтың айтуынша "Бюджетті толықтыру электрондық сервистер мен технологиялардың дамуына, қызметкерлердің жергілікті жерлердегі жұмыс сапасына байланысты, сондықтан қазір азаматтарға қызмет көрсету үшін қолайлы жағдай жасауға бағытталған".

Талдықорған қаласы бойынша салық басқармасының әкімшілік ғимараты барлық заманауи талаптарға жауап береді.

Мәселен, салық төлеушілерге қызмет көрсетудің кедергісіз принципі, кезекті басқарудың электрондық жүйесі енгізілді, салық төлеушінің терминалы жұмыс істейді, салық төлеуге арналған кассалар, терминалдар бар.

Мемлекеттік органның қызметін бағалай отырып, Агенттік Төрағасы мемлекеттік қызметтердің қолжетімділігі мен сапасы, сыбайлас жемқорлық деңгейін төмендету мәселелері тұрақты негізде барлық қызмет көрсетушілердің басым ұстанымдары болуы тиіс екенін атап өтті.